ຊົມ​ເຊີຍ​ຜົນສຳເລັດ ກອງ​ປະ​ຊຸມ​ໃຫຍ່​​ອົງ​ຄະ​ນະ​ພັກ ຄະ​ນະ​ພົວ​ພັນ​ຕ່າງ​ປະ​ເທດ​ສ​ູນ​ກາງ​ພັກ ຄັ້ງທີ I ຢ່າງ​ສຸດ​ໃຈ. " ຍົກສູງຄວາມສາມາດນຳພາ ແລະ ລັກສະນະນຳໜ້າຂອງພັກ, ເພີ່ມທະວີມະຫາສາມັກຄີທົ່ວປວງຊົນທັງຊາດ, ຢຶດໝັ້ນແນວທາງປ່ຽນແປງໃໝ່ຮອບດ້ານ ແລະ ມີຫຼັກການ, ປົກປັກຮັກສາ ແລະ ພັດທະນາປະເທດຊາດ ຕາມທິດຢືນຍົງ ສູ່ຈຸດມຸ້ງໝາຍສັງຄົມນິຍົມຢ່າງແທ້ຈິງ ".

ພະນົມເປັນ, ວັນທີ 11 ມັງກອນ 2016

ເຖິງ: ຄະນະບໍລິຫານງານສູນກາງ ພັກປະຊາຊົນ ປະຕິວັດລາວ

ທີ່ ນະຄອນຫຼວງວຽງຈັນ,

    ຄະນະບໍລິຫານງານສູນກາງ ພັກປະຊາຊົນກຳປູເຈຍ ຂໍສະແດງຄວາມຊົມເຊີຍເປັນຢ່າງຍິ່ງ ຕໍ່ກອງປະຊຸມໃຫຍ່ ຄັ້ງທີ X ຂອງຄະນະບໍລິຫານງານສູນກາງ ພັກປະຊາຊົນ ປະຕິວັດລາວ.

  ພວກຂ້າພະເຈົ້າ ໄດ້ສັງເກດເຫັນວ່າ ໃນຊ່ວງເວລາບໍ່ເທົ່າໃດປີທີ່ຜ່ານມານີ້ ພັກປະຊາຊົນ ປະຕິວັດລາວ, ລັດຖະບານ ແລະ ປະຊາຊົນລາວບັນດາເຜົ່າ ໄດ້ປະສົບຜົນສຳເລັດອັນໃຫຍ່ຫຼວງໃນການພັດທະນາປະເທດຊາດ ໂດຍສະເພາະຜົນສຳເລັດໃນການປະຕິບັດ ມະຕິຕົກລົງຂອງກອງປະຊຸມໃຫຍ່ ຄັ້ງທີ IX ຂອງພັກປະຊາຊົນ ປະຕິວັດລາວ ເມື່ອເດືອນມີນາ 2011 ອັນໄດ້ເຮັດໃຫ້ປະເທດລາວ ມີຄວາມຈະເລີນກ້າວໜ້າໃນທຸກດ້ານ, ຊີວິດການເປັນຢູ່ຂອງປະຊາຊົນລາວບັນດາເຜົ່າ ນັບມື້ນັບດີຂຶ້ນ ແລະ ຊື່ສຽງຂອງ ສາທາລະນະລັດ ປະຊາທິປະໄຕ ປະຊາຊົນລາວ ນັບມື້ນັບພົ້ນເດັ່ນຂຶ້ນໃນເວທີສາກົນ.

 

   ພວກຂ້າພະເຈົ້າ ມີຄວາມເຊື່ອໝັ້ນຢ່າງໜັກແໜ້ນວ່າ ກອງປະຊຸມໃຫຍ່ຂອງ ພັກປະຊາຊົນ ປະຕິວັດລາວ ຄັ້ງທີ X ນີ້ ຈະຮັບຮອງເອົາບັນດາມະຕິຕົກລົງຕ່າງໆທີ່ມີຄວາມໝາຍສຳຄັນ ໂດຍກຳນົດເອົາທິດທາງ ແລະ ພາລະກິດ ເພື່ອນຳໄປປະຕິບັດໃນໄລຍະ 5 ປີ ຕໍ່ໜ້າອີກ, ເລັງໃສ່ຊຸກຍູ້ຂັບເຄື່ອນການພັດທະນາການເມືອງ, ເສດຖະກິດ ແລະ ສັງຄົມຂອງ ສາທາລະນະລັດ ປະຊາທິປະໄຕ ປະຊາຊົນລາວ ໃຫ້ດຳເນີນໄປໄດ້ໄວ ແລະ ນັບມື້ນັບຈະເລີນກ້າວໜ້າເຂັ້ມແຂງຕື່ມອີກ.

  ພວກຂ້າພະເຈົ້າ ມີຄວາມປື້ມປິຕິຍິນດີເປັນຢ່າງຍິ່ງ ຕໍ່ການເຕີບໃຫຍ່ຂະຫຍາຍຕົວຂອງສາຍພົວພັນ ລະຫວ່າງ ພັກທັງສອງຂອງພວກເຮົາໃນໄລຍະຜ່ານມາ ແລະ ສືບຕໍ່ເພີ່ມພູນຄູນສ້າງ, ເສີມຂະຫຍາຍສາຍພົວພັນ ມິດຕະພາບ, ຄວາມສາມັກຄີ ທີ່ມີມູນເຊື້ອ ແລະ ການຮ່ວມມືຮອບດ້ານ ລະຫວ່າງ ພັກ, ລັດຖະບານ ແລະ ປະຊາຊົນສອງຊາດຂອງພວກເຮົາ ກຳປູເຈຍ-ລາວ ກໍຄືລະຫວ່າງ ພັກ, ລັດຖະບານ ແລະ ປະຊາຊົນສາມຊາດຂອງພວກເຮົາ: ກຳປູເຈຍ-ລາວ-ຫວຽດນາມ ເພື່ອຜົນປະໂຫຍດອັນສູງສົ່ງຂອງປະເທດຊາດ ແລະ ປະຊາຊົນຂອງແຕ່ລະປະເທດ ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາໃນຂົງເຂດ ແລະ ໃນໂລກ.

 ໃນໂອກາດອັນສະຫງ່າລາສີນີ້, ຄະນະບໍລິຫານງານສູນກາງ ພັກປະຊາຊົນກຳປູເຈຍ ຂໍອວຍພອນໄຊອັນປະເສີດ ມາຍັງ ກອງປະຊຸມໃຫຍ່ ຄັ້ງທີX ຂອງພັກປະຊາຊົນ ປະຕິວັດລາວ ຂໍໃຫ້ດຳເນີນໄປດ້ວຍຄວາມລາບລື່ນ ແລະ ໄດ້ຮັບຜົນສຳເລັດຢ່າງສະຫງ່າງາມ ແລະ ຂໍອວຍພອນມາຍັງພັກ, ລັດຖະບານ ແລະ ປະຊາຊົນລາວບັນດາເຜົ່າ ຂໍໃຫ້ໄດ້ຮັບຜົນສຳເລັດໃໝ່ໆ ຍິ່ງໃຫຍ່ກວ່າເກົ່າໃນການປະຕິບັດມະຕິຕົກລົງຂອງກອງປະຊຸມໃຫຍ່ຂອງ ພັກປະຊາຊົນ ປະຕິວັດລາວ ຄັ້ງທີ X ນີ້ ເພື່ອສ້າງສາພັດທະນາ ສາທາລະນະລັດ ປະຊາທິປະໄຕ ປະຊາຊົນລາວ ໃຫ້ມີຄວາມຈະເລີນຮຸ່ງເຮືອງຕາມຄາດໝາຍທີ່ວາງໄວ້.

  ຂໍໃຫ້ສາຍພົວພັນມິດຕະພາບ ຄວາມສາມັກຄີ ທີ່ມີມູນເຊື້ອອັນດີງາມ ແລະ ການຮ່ວມມື ລະຫວ່າງ ພັກ, ລັດຖະບານ ແລະ ປະຊາຊົນສອງປະເທດພວກເຮົາ ຈົ່ງນັບມື້ນັບເຕີບໃຫຍ່ຂະຫຍາຍຕົວ, ເຂັ້ມແຂງ ແລະ ໝັ້ນຄົງຕະຫຼອດໄປ.

ຄະນະບໍລິຫານງານສູນກາງ

ພັກປະຊາຊົນ ກຳປູເຈຍ

party x

ສະຖິຕິຜູ້ເຂົ້າຊົມ

152200
Today273
Yesterday288
This_Week818
This_Month6532
All_Days152200