ຊົມ​ເຊີຍ​ຜົນສຳເລັດ ກອງ​ປະ​ຊຸມ​ໃຫຍ່​​ອົງ​ຄະ​ນະ​ພັກ ຄະ​ນະ​ພົວ​ພັນ​ຕ່າງ​ປະ​ເທດ​ສ​ູນ​ກາງ​ພັກ ຄັ້ງທີ I ຢ່າງ​ສຸດ​ໃຈ. " ຍົກສູງຄວາມສາມາດນຳພາ ແລະ ລັກສະນະນຳໜ້າຂອງພັກ, ເພີ່ມທະວີມະຫາສາມັກຄີທົ່ວປວງຊົນທັງຊາດ, ຢຶດໝັ້ນແນວທາງປ່ຽນແປງໃໝ່ຮອບດ້ານ ແລະ ມີຫຼັກການ, ປົກປັກຮັກສາ ແລະ ພັດທະນາປະເທດຊາດ ຕາມທິດຢືນຍົງ ສູ່ຈຸດມຸ້ງໝາຍສັງຄົມນິຍົມຢ່າງແທ້ຈິງ ".

27Aug2019.2

   ໂດຍປະຕິບັດຕາມພາລະບົດບາດ, ສິດ ແລະ ໜ້າທີ່ຂອງຄະນະພົວພັນຕ່າງປະເທດສູນກາງພັກ ແລະ ເພື່ອຖອດຖອນບົດຮຽນໃນການເຄື່ອນໄຫວວຽກງານການຕ່າງປະເທດຂອງບັນດາອົງການພັກ, ສູນກາງແນວລາວສ້າງຊາດ, ບັນດາອົງການຈັດຕັ້ງມະຫາຊົນຂັ້ນສູນກາງ, ສະມາຄົມມິດຕະພາບຂອງລາວກັບຕ່າງປະເທດ ແລະ ຄະນະສັນຕິພາບ ແລະ ສາມັກຄີຂອງລາວ ໃນ 6 ເດືອນຕົ້ນປີ 2019, ໃນຕອນບ່າຍວັນທີ 27/08/2019, ຄະນະພົວພັນຕ່າງປະເທດສູນກາງພັກ ໄດ້ເປັນເຈົ້າພາບຈັດກອງປະຊຸມສະຫຼຸບຖອດຖອນບົດຮຽນການເຄື່ອນໄຫວຕ່າງປະເທດຂອງບັນດາອົງການພັກ, ສູນກາງແນວລາວສ້າງຊາດ ແລະ ບັນດາອົງການຈັດຕັ້ງມະຫາຊົນຂັ້ນສູນກາງ ໂດຍການເປັນປະທານຂອງ ສະຫາຍ ປອ. ນາງ ສູນທອນ ໄຊຍະຈັກ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ແລະ ມີບັນດາຄະນະນໍາ, ຄະນະກົມ ແລະ ພະນັກງານທີ່ກ່ຽວຂ້ອງຈາກ ອົງການຈັດຕັ້ງຕ່າງໆ ເຂົ້າຮ່ວມຈຳນວນ 62 ສະຫາຍ.
   ໃນກອງປະຊຸມ ສະຫາຍ ສົມພອນ ສີຈະເລີນ, ຮອງຫົວໜ້າຄະນະພົວພັນຕ່າງປະເທດສູນກາງພັກ ໄດ້ຜ່ານບົດສະຫຼຸບສັງລວມກ່ຽວກັບການເຄື່ອນໄຫວວຽກງານການຕ່າງປະເທດຂອງພັກ ແລະ ການທູດປະຊາຊົນ ໃນໄລຍະ 6 ເດືອນຕົ້ນປີ 2019, ໂດຍໄດ້ຕີລາຄາດ້ານດີ, ດ້ານຄົງຄ້າງ, ບົດຮຽນທີ່ຖອດຖອນໄດ້ ແລະ ສະເໜີທິດທາງແຜນການເຄື່ອນໄຫວໃນປີຕໍ່ໜ້າຂອງບັນດາອົງການຈັດຕັ້ງດັ່ງກ່າວ. ນອກຈາກນັ້ນ, ບັນດາຜູ້ແທນເຂົ້າຮ່ວມກອງປະຊຸມໄດ້ແລກປ່ຽນຄວາມຄິດເຫັນຢ່າງກົງໄປກົງມາ ກ່ຽວກັບການຈັດຕັ້ງປະຕິບັດການເຄື່ອນໄຫວວຽກງານການຕ່າງປະເທດຂອງພັກ, ສູນກາງແນວລາວສ້າງຊາດ ແລະ ບັນດາອົງການຈັດຕັ້ງມະຫາຊົນຂັ້ນສູນກາງ ໂດຍເນັ້ນເຖິງຄວາມສໍາຄັນ ແລະ ຈໍາເປັນໃນການເພີ່ມທະວີການເປັນເສນາທິການໃຫ້ແກ່ສູນກາງພັກ, ການພົວພັນປະສານງານ, ການນຳໃຊ້ງົບປະມານ ແລະ ອື່ນໆ.
   ໃນກອງປະຊຸມຄັ້ງນີ້, ສະຫາຍ ປອ. ນາງ ສູນທອນ ໄຊຍະຈັກ ຍັງໄດ້ເປັນກຽດປະກອບຄຳເຫັນໂອ້ລົມໂດຍໄດ້ສະແດງຊົມເຊີຍ ແລະ ຕີລາຄາຜົນງານ, ຜົນສໍາເລັດຂອງການເຄື່ອນໄຫວການຕ່າງປະເທດຂອງພັກ ແລະ ການທູດປະຊາຊົນ, ໂດຍເນັ້ນເຖິງຄວາມຈໍາເປັນໃນການເປີດກວ້າງການພົວພັນກັບຕ່າງປະເທດ, ການໂຄສະນາຕໍ່ຕ່າງປະເທດໃນເງື່ອນໄຂທີ່ ສປປ ລາວ ພວມມີການເຊື່ອມໂຍງກັບພາກພື້ນ ແລະ ສາກົນ, ບົນພື້ນຖານປະຕິບັດແນວທາງການຕ່າງປະເທດສັນຕິພາບ, ເອກະລາດ, ມິດຕະພາບ ແລະ ການຮ່ວມມືຢ່າງສະເໝີຕົ້ນສະເໝີປາຍເພື່ອປະກອບສ່ວນໃນການສ້າງສະພາບແວບລ້ອມສາກົນທີ່ອໍານວຍຄວາມສະດວກແກ່ການປົກປັກຮັກສາ ແລະ ພັດທະນາປະເທດຊາດ, ສືບຕໍ່ຍົກສູງຖານະບົດບາດຂອງພັກ, ລັດເຮົາໃນເວທີພາກພື້ນ ແລະ ສາກົນ.

party x

ສະຖິຕິຜູ້ເຂົ້າຊົມ

152200
Today273
Yesterday288
This_Week818
This_Month6532
All_Days152200