ຊົມ​ເຊີຍ​ຜົນສຳເລັດ ກອງ​ປະ​ຊຸມ​ໃຫຍ່​​ອົງ​ຄະ​ນະ​ພັກ ຄະ​ນະ​ພົວ​ພັນ​ຕ່າງ​ປະ​ເທດ​ສ​ູນ​ກາງ​ພັກ ຄັ້ງທີ I ຢ່າງ​ສຸດ​ໃຈ. " ຍົກສູງຄວາມສາມາດນຳພາ ແລະ ລັກສະນະນຳໜ້າຂອງພັກ, ເພີ່ມທະວີມະຫາສາມັກຄີທົ່ວປວງຊົນທັງຊາດ, ຢຶດໝັ້ນແນວທາງປ່ຽນແປງໃໝ່ຮອບດ້ານ ແລະ ມີຫຼັກການ, ປົກປັກຮັກສາ ແລະ ພັດທະນາປະເທດຊາດ ຕາມທິດຢືນຍົງ ສູ່ຈຸດມຸ້ງໝາຍສັງຄົມນິຍົມຢ່າງແທ້ຈິງ ".

27Aug201927Aug2019.1

    ໃນຕອນເຊົ້າຂອງວັນທີ 27/08/2019, ຄະນະພົວພັນຕ່າງປະເທດສູນກາງພັກ ໄດ້ຈັດປາຖະກະຖາເຊື່ອມຊຶມເອກະ ສານສຳຄັນຂອງຊາດ ແລະ ສາກົນຄື: ວັນຢຶດອໍານາດທົ່ວປະເທດ 23 ສິງຫາ 1945 ຄົບຮອບ 74 ປີ ແລະ ວັນຢຶດອໍານາດທົ່ວປະເທດໃນເດືອນ ສິງຫາ ປີ 1975 ຄົບຮອບ 44 ປີ; ວັນສ້າງຕັ້ງແນວລາວສ້າງຊາດ ຄົບຮອບ 69 ປີ; ວັນລັດຖະທໍາມະນູນ ແຫ່ງ ສປປລາວ ຄົບຮອບ 28 ປີ; ວັນສ້າງຕັ້ງ ອາຊຽນ ຄົບຮອບ 52 ປີ; ວັນເກີດ ທ່ານ ຟີແດນ ກາສໂຕຣ ຣຸດສ ຄົບຮອບ 93 ປີ; ດຳລັດຂອງລັດຖະບານ ວ່າດ້ວຍການແຂ່ງຂັນ ແລະ ຍ້ອງຍໍ ແລະ ຄໍາແນະນຳ ຂອງກະຊວງພາຍໃນ ກ່ຽວກັບການຈັດຕັ້ງ ປະຕິບັດດໍາລັດ ວ່າດ້ວຍການແຂ່ງຂັນ ແລະ ຍ້ອງຍໍ, ເຊິ່ງໃຫ້ກຽດປາຖະກະຖາໂດຍ ສະຫາຍ ປອ ນາງ ສູນທອນ ໄຊຍະຈັກ, ກໍາມະການສູນກາງພັກ, ເລຂາຄະນະພັກ, ຫົວໜ້າຄະນະພົວພັນຕ່າງປະເທດສູນກາງພັກ, ມີບັນດາສະຫາຍ ໃນຄະນະພັກ, ຄະນະກົມ, ພະແນກ ແລະ ພະນັກງານວິຊາການ ພາຍໃນຄະນະພົວພັນຕ່າງປະເທດສູນກາງພັກ ເຂົ້າຮ່ວມຮັບຟັງຢ່າງພ້ອມພຽງ.

   ໃນການປາຖະກະຖາໃນຄັ້ງນີ້ ສະຫາຍ ຫົວໜ້າ ຄະນະພົວພັນຕ່າງປະເທດສູນກາງພັກ ໄດ້ຫວນຄືນມູນເຊື້ອ; ການຕໍ່ສູ້ກູ້ຊາດ ອັນພິລະອາດຫານ ຂອງປະຊາຊົນລາວ ກ່ອນທີ່ບໍ່ທັນມີພັກ ປະຕິວັດນຳພາ ແລະ ການຕໍ່ສູ້ຕ້ານພວກລ່າເມືອງຂຶ້ນເກົ່າ ແລະ ໃໝ່ ພາຍໃຕ້ການນຳພາອັນຖືກຕ້ອງ ສະຫຼາດສ່ອງໃສຂອງພັກປະຕິວັດ ຄືພັກກອມມູນິດອິນດູຈີນ, ເຊິ່ງເປັນຕົ້ນກຳເນີດຂອງພັກ ປະຊາຊົນ ປະຕິວັດລາວ, ຈົນກ້າວໄປເຖິງ ໄຊຊະນະສຸດທ້າຍ, ສຳເລັດການປະຕິວັດຊາດ ປະຊາທິປະໄຕ ສະຖາປະນາ ເປັນ ສປປ ລາວ ໃນປີ 1975, ເຊິ່ງເປັນການເປີດສັງກາດໃໝ່ໃຫ້ແກ່ການເປັນເຈົ້າຊາຕາກຳ ປະເທດຊາດ ຂອງ ປະຊາຊົນລາວ.
   ຈາກນັ້ນ, ສະຫາຍຫົວໜ້າ ຄຕພ ໄດ້ຫວນຄືນປະຫວັດສາດການກໍາເນີດ, ການເຕີບໃຫຍ່ຂະຫຍາຍຕົວ ແລະ ມູນເຊື້ອອັນສະຫງ່າງາມ ແລະ ຜົນງານທີ່ພົ້ນເດັ່ນ ຂອງແນວລາວສ້າງຊາດ ຕະຫຼອດໄລຍະເວລາ 69 ປີ ຜ່ານມາ; ໄດ້ຫວນຄືນປະຫວັດຄວາມເປັນມາຂອງອາຊຽນ, ການສ້າງປະຊາຄົມອາຊຽນ ແລະ ຜົນປະໂຫຍດທີ່ ສປປລາວ ໄດ້ຮັບໃນການຮ່ວມມືກັບອາຊຽນ ແລະ ສາກົນ ພ້ອມທັງຍົກໃຫ້ເຫັນຄວາມຫຍຸ້ງຍາກ ແລະ ສິ່ງທ້າທາຍທີ່ປະເທດເຮົາ ຈະຕ້ອງປັບຕົວໃນການເຊື່ອມໂຍງກັບສາກົນ.
   ຕໍ່ມາສະຫາຍ ສົມພອນ ສິຈະເລີນ, ຮອງຫົວໜ້າຄະນະພົວພັນຕ່າງປະເທດສູນກາງພັກ ໄດ້ເນັ້ນເຖິງຄວາມສຳຄັນຂອງລັດຖະທຳມະນູນ ແລະ ການປະຕິບັດ ລັດຖະທຳມະນູນ, ການສ້າງລະບົບກົດໝາຍເພື່ອແນໃສ່ ສ້າງລັດເຮົາເປັນລັດທີ່ ຄຸ້ມຄອງດ້ວຍກົດໝາຍ ເພື່ອປົກປ້ອງສິດທິອັນຊອບທຳ ແລະ ນຳເອົາຜົນປະໂຫຍດຕົວຈິງມາສູ່ປະຊາຊົນລາວບັນດາເຜົ່າ, ຍົກໃຫ້ເຫັນເຖິງ ຊີວິດ ແລະ ການເຄື່ອນໄຫວປະຕິວັດຂອງ ທ່ານ ຟີແດນ ກາສໂຕຣ ຣຸດສ ຜູ້ນຳທີ່ແສນເຄົາລົບຮັກ, ວິລະຊົນ ແລະ ນັກປະຕິ ວັດທີ່ດີເດັ່ນຂອງປະຊາຊົນກູບາ ແລະ ປະຊາຊົນ ຊາວຜູ້ອອກແຮງງານທີ່ຮັກຫອມ ສັນຕິພາບໃນໂລກ ແລະ  ໃນຕອນທ້າຍ ສະຫາຍ ຮອງຫົວໜ້າຄະນະພົວພັນຕ່າງປະເທດ ໄດ້ເຜີຍແຜ່ເອກະສານ ກ່ຽວກັບດຳລັດຂອງລັດຖະບານ ວ່າດ້ວຍການແຂ່ງຂັນ ແລະ ຍ້ອງຍໍ ແລະ ຄໍາແນະນຳ ຂອງກະຊວງພາຍໃນ ກ່ຽວກັບການຈັດຕັ້ງ ປະຕິບັດດໍາລັດ ວ່າດ້ວຍການແຂ່ງຂັນ ແລະ ຍ້ອງຍໍ ໂດຍໄດ້ຍົກໃຫ້ເຫັນເຖິງເນື້ອໃນ, ຫຼັກການ, ລະບຽບການ ແລະ ມາດຕະການ ໃນການຄຸ້ມຄອງ, ຕິດຕາມ, ກວດກາການເຄື່ອນ ໄຫວວຽກງານແຂ່ງຂັນຍ້ອງຍໍ ເພື່ອເຮັດໃຫ້ວຽກງານດັ່ງກ່າວ ໄດ້ຮັບການຈັດຕັ້ງປະຕິບັດໃຫ້ມີປະສິດທິພາບ ແລະ ມີຄວາມເປັນເອກະພາບໃນທົ່ວປະເທດ.

party x

ສະຖິຕິຜູ້ເຂົ້າຊົມ

152200
Today273
Yesterday288
This_Week818
This_Month6532
All_Days152200