ຊົມ​ເຊີຍ​ຜົນສຳເລັດ ກອງ​ປະ​ຊຸມ​ໃຫຍ່​​ອົງ​ຄະ​ນະ​ພັກ ຄະ​ນະ​ພົວ​ພັນ​ຕ່າງ​ປະ​ເທດ​ສ​ູນ​ກາງ​ພັກ ຄັ້ງທີ I ຢ່າງ​ສຸດ​ໃຈ. " ຍົກສູງຄວາມສາມາດນຳພາ ແລະ ລັກສະນະນຳໜ້າຂອງພັກ, ເພີ່ມທະວີມະຫາສາມັກຄີທົ່ວປວງຊົນທັງຊາດ, ຢຶດໝັ້ນແນວທາງປ່ຽນແປງໃໝ່ຮອບດ້ານ ແລະ ມີຫຼັກການ, ປົກປັກຮັກສາ ແລະ ພັດທະນາປະເທດຊາດ ຕາມທິດຢືນຍົງ ສູ່ຈຸດມຸ້ງໝາຍສັງຄົມນິຍົມຢ່າງແທ້ຈິງ ".

 

 

2020 07 03 at 15.01

ກອງປະຊຸມໃຫຍ່ຊາວໜຸ່ມຄະນະພົວພັນຕ່າງປະເທດສູນກາງພັກ ຄັ້ງທີ I ໄດ້ໄຂຂື້ນຢ່າງເປັນທາງການໃນວັນທີ 3 ກໍລະກົດ 2020 ທີ່ສຳນັກງານຄະນະພົວພັນຕ່າງປະເທດສູນກາງພັກ ພາຍໃຕ້ການເປັນປະທານຂອງສະ​ຫາຍ ​ຄຳ​ເຟື້ອງ​ ພັນ​ທະ​ໄຊ, ເລ​ຂາ​​ຄະ​ນະ​ບໍ​ລິ​ຫານ​ງານ​ຊາວ​ໜຸ່ມ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ໂດຍເປັນກຽດເຂົ້າຮ່ວມຂອງສະຫາຍ ປອ. ນາງ ສູນ​ທອນ ໄຊ​ຍະ​ຈັກ, ກຳມະການ​ສູນ​ກາງ​ພັກ, ເລຂາຄະ​ນະ​ພັກ, ຫົວໜ້າຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ, ສະຫາຍ ອາ​ລຸນ​ໄຊ ສູນ​ນະ​ລາດ, ກຳ​ມະ​ການ​ສຳ​ຮອງ​ສູນ​ກາ​ງ​ພັກ, ສະ​ມ​າຊິກ​ສະ​ພາ​ແຫ່ງຊາດ ຊຸດ​ທີ 8, ເລ​ຂາ​ຄະ​ນະ​ພັກ​, ເລ​ຂາຄະນະບໍລິຫານງານສູນ​ກາງ​ຊາວໜຸ່ມປະ​ຊາ​ຊົນປະ​ຕິ​ວັດ​ລາວ, ມີບັນດາສະຫາຍໃນຄະນະພັກ, ເລຂາບັນດາໜ່ວພັກ, ອົງການຈັດຕັ້ງມະຫາຊົນ, ຄະນະບໍລິຫານງານຊາວໜຸ່ມ, ບັນດາສະມາຊິກຊາວໜຸ່ມຄະນະພົວພັນຕ່າງປະເທດສູນກາງພັກແລະບັນດາແຂກຖືກເຊີນເຂົ້າຮ່ວມຢ່າງພ້ອມພຽງ.

ກອງປະຊຸມໃຫຍ່ໄດ້ຮັບຟັງບົດລາຍງານການເມືອງ ຂອງຄະນະບໍລິຫານງານຊາວໜຸ່ມ ຄຕພ ໄລຍະ 4 ປີຜ່ານມາ ສະເໜີໂດຍ ສະຫາຍ ຄຳເຟື້ອງ ພັນທະໄຊ, ເລຂາຄະນະບໍລິຫານງານຊາວໜຸ່ມ ຄຕພໂດຍໄດ້ຕີລາຄາຢ່າງເລິກເຊີ່ງແລະຮອບດ້ານຕໍ່ຜົນສຳເລັດໃນການຊີ້ນຳໆພາຂອງຄະນະບໍລິຫານງານຊາວໜຸ່ມຄະນະພົວພັນຕ່າງປະເທດສູນກາງພັກຍາດມາໄດ້ໃນໄລຍະທີ່ຜ່ານມາ (2015-2019), ຕີລາຄາຈຸດດີ, ​ຈຸດອ່ອນແລະຂໍ້ຄົງຄ້າງ, ບົດຮຽນທີ່ຖອດຖອນໄດ້ເພື່ອປັບປຸງແກ້ໄຂໃນຕໍ່ໜ້າ, ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນງານການສ້າງຂະບວນການຊາວໜຸ່ມ 4 ບຸກ ເຊິ່ງຄະນະບໍລິຫານງານຊາວໜຸ່ມ ຄຕພ ໄດ້ຮັບນາມມະຍົດດັ່ງກ່າວໃນວັນທີ 29/06/2020 ຜ່ານມາ. ກອງປະຊຸມຍັງໄດ້ເປັນເອກະພາບໃນການວາງທິດທາງໜ້າທີ່ຂອງຄະນະບໍລິຫານງານຊາວໜຸ່ມ ຄຕພ ໃນໄລຍະຕໍ່ໜ້າ.

ກອງປະຊຸມໄດ້ໃຊ້ສິດປະຊາທິປະໄຕປ່ອນບັດເລືອກຕັ້ງເອົາຄະນະບໍລິຫານງານຊາວໜຸ່ມຄະນະພົວພັນຕ່າງປະເທດສູນກາງພັກຊຸດໃໝ່ຈຳນວນ 9 ສະຫາຍ, ຍິງ 01 ສະຫາຍແລະໃນນັ້ນໄດ້ເລືອກເອົາສະຫາຍຄຳເຟື້ອງ ພັນທະໄຊ, ເປັນເລຂາ; ສະຫາຍ ວົງຄຳ ແສນສະທິດ, ເປັນຮອງເລຂາ, ທັງເປັນປະທານກວດກາ.

ຕອນທ້າຍກອງປະຊຸມໃຫຍ່ຍັງໄດ້ຮັບຟັງການໂອ້ລົມຂອງ ສະຫາຍ ປອ. ນາງ ສູນ​ທອນ ໄຊ​ຍະ​ຈັກ, ກຳມະການ​ສູນ​ກາງ​ພັກ, ເລຂາຄະ​ນະ​ພັກ, ຫົວໜ້າຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ແລະ ສະຫາຍ ອາ​ລຸນ​ໄຊ ສູນ​ນະ​ລາດ, ກຳ​ມະ​ການ​ສຳ​ຮອງ​ສູນ​ກາ​ງ​ພັກ, ສະ​ມ​າຊິກ​ສະ​ພາ​ແຫ່ງຊາດ ຊຸດ​ທີ 8, ເລ​ຂາ​ຄະ​ນະ​ພັກ, ເລຂາຄະນະບໍລິຫານງານສູນ​ກາງ​ຊາວ​ໜຸ່ມ​ປະ​ຊາ​ຊ​ົນ​ປະ​ຕິ​ວັດ​ລາວ ທີ່ໄດ້ມີການຕີລາຄາສູງ ແລະ ຊົມເຊີຍບັນດາຜົນສຳເລັດ, ຜົນງານຂອງຄະນະບໍລິຫານງານຊາວໜຸ່ມ ຄຕພ ໃນໄລຍະຜ່ານມາ ແລະ ໃຫ້ຄຳຕັກເຕືອນ, ຊີ້ນຳໃນການເຄື່ອນໄຫວຂອງຄະນະບໍລິຫານງານໃນຕໍ່ໜ້າ​ ເພື່ອ​ເປັນ​ເຂັມ​ຊີ້​ທິດ​ເຍືອງ​ທາງ ແລະ ເປັນບ່ອນອີງສຳຄັນ ​ໃຫ້​ແກ່ຄະ​ນະ​ບໍ​ລິ​ຫານ​ງານ​ຊາວ​ໜຸ່ມ​ຊຸດ​ໃໝ່​ນຳ​ໄປຈັດຕັ້ງຜັນຂະຫຍາຍເຂົ້າໃນການ​ຊີ້​ນຳ​ໆພາວຽກງານຊາວໜຸ່ມ ຂອງຄະນະພົວພັນຕ່າງປະເທດສູນກາງພັກ ​ໃຫ້​ມີ​ຜົນ​ສຳ​ເລັດຫຼາຍ​ກວ່າ​ເກົ່າ ແລະ ສາມາດເຮັດສຳເລັດໜ້າທີ່ການເມືອງໃນໄລຍະໃໝ່ເປັນຢ່າງດີ.

       30 jun 2020

        ໃນຕອນເຊົ້າຂອງວັນທີ 30 ມິຖຸນາ 2020, ຄະນະພົວພັນຕ່າງປະເທດສູນກາງພັກ ໄດ້ຈັດພິທີມອບ - ຮັບບັດສະມາຊິກພັກສົມບູນ ຊຸດທີ 03 ໃຫ້ສະມາຊິກພັກສົມບູນ ຜູ້ທີ່ຄົບມາດຖານເງື່ອນໄຂ ຈຳນວນ 12 ສະຫາຍ ໂດຍໃຫ້ກຽດເປັນປະທານຂອງສະຫາຍ ປອ.ນາງ ສູນທອນ ໄຊຍະຈັກ, ກຳມະການສູນກາງພັກ, ເລຂາຄະນະພັກ, ຫົວໜ້າຄະນະພົວພັນຕ່າງປະເທດສູນກາງພັກ ແລະມີບັນດາ ສະຫາຍໃນຄະນະພັກ, ຄະນະກົມ ແລະ ສະມາຊິກພັກ ອ້ອຂ້າງຄະນະພົວພັນຕ່າງປະເທດສູນກາງພັກເຂົ້າຮ່ວມຢ່າງພ້ອມພຽງ.

   ໃນພິທີ, ສະຫາຍ ນາງ ພອນດາວັນ ພິນສະຫວັນ, ຫົວໜ້າຫ້ອງການຄະນະພັກ ຄຕພ, ຫົວໜ້າກົມຈັດຕັ້ງ - ພະນັກງານໄດ້ຜ່ານຂໍ້ຕົກລົງການອະນຸມັດມອບບັດສະມາຊິກພັກສົມບູນຂອງພັກ ປະຊາຊົນປະຕິວັດລາວ.

   ໃນໂອກາດທີ່ມີຄວາມໝາຍສໍາຄັນນີ້ ສະຫາຍ ປອ ນາງ ສູນທອນ ໄຊຍະຈັກ, ກໍາມະການສູນກາງພັກ, ເລຂາຄະນະພັກ, ຫົວໜ້າ ຄະນະພົວພັນຕ່າງປະເທດສູນກາງພັກ ໄດ້ໃຫ້ກຽດຂຶ້ນມອບບັດສະມາຊິກພັກ ໃຫ້ແກ່ສະມາຊິກພັກສົມບູນ 12 ສະຫາຍ ແລະ ໄດ້ມີຄຳເຫັນໂອ້ລົມຕໍ່ສະມາຊິກພັກ ຂອງຄະນະພົວພັນຕ່າງປະເທດສູນກາງພັກ ໂດຍສະຫາຍໄດ້ເນັ້ນໜັກເຖິງ ຄວາມໝາຍ ແລະ ຄວາມສຳຄັນຂອງບັດສະມາຊິກພັກ ເພື່ອໃຫ້ ສະມາຊິກພັກກໍາໄດ້ເນື້ອໃນຈິດໃຈ, ຄວາມໝາຍສໍາຄັນຂອງການອອກບັດ ແລະ ມອບບັດສະມາຊິກພັກ ເຊິ່ງເປັນຂະບວນການຂອງທົ່ວພັກ ເພື່ອແນໃສ່ການເພີ່ມທະວີການຄຸ້ມຄອງສະມາຊິກພັກ, ຄຸ້ມຄອງການຈັດຕັ້ງພັກ ແລະ ປ້ອງກັນພັກ, ເພື່ອໃຫ້ພັກ ເພີ່ມຄວາມເຂັ້ມແຂງ, ສືບຕໍ່ມີບົດບາດຊີ້ນໍາ - ນໍາພາສືບທອດປົກປັກຮັກສາ ແລະ ສ້າງສາປະເທດຊາດ.

  ໃນວັນດຽວກັນ, ຄະນະພົວພັນຕ່າງປະເທດສູນກາງພັກ ຍັງໄດ້ຈັດການໂອ້ລົມ ພະນັກງານຫຼັກແຫຼ່ງ ກ່ອນພັກຜ່ອນຮັບບໍານານ ແລະ ພະນັກງານ ທີ່ມີຄວາມຫ້າວຫັນ ໄດ້ຮັບການເລື່ອນຕໍາແໜ່ງບໍລິຫານຂັ້ນພະແນກ ຈໍານວນໜຶ່ງ.

2020 06 30

ວັນ​ທີ 29 ມິ​ຖຸ​ນາ 2020, ທີ່ສຳນັກງານ ຄະນະພົວພັນຕ່າງປະເທດສູນກາງພັກ ໄດ້​ມີ​ພິ​ທີ​ປະ​ກາດ​ນາມ​ມະ​ຍົດ​ ຄະ​ນະ​ຊາວ​ໜຸ່ມ ປະ​ຊາ​ຊົນ ​ປະ​ຕິ​ວັດ​ລາວ 4 ບຸກ ໃຫ້​ແກ່ ຄະ​ນະ​ຊາວ​ໜຸ່ມ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາ​ງ​ພັກ.ໃຫ້​ກຽດ​ເຂົ້າ​ຮ່ວມ​ໃນ​ພິ​ທີ​ຄັ້ງນີ້ມີສະ​ຫາຍ ນາງ ວິ​ລະ​ວອນ ພັນ​ທະ​ວົງ, ຮອງເລຂາຄະນະພັກ, ຮອງ​ເລ​ຂາ​ຄະ​ນະ​ບໍ​ລິ​ຫານ​ງານ​, ປະທານກວດກາສູນ​ກາງ​ຊາວ​ໜຸ່ມ ປະ​ຊາ​ຊົນ ປະ​ຕິ​ວັດ​ລາວ, ສະຫາຍ ສົມດີ ບຸນຄຸ້ມ, ກຳມະການຄະນະພັກ, ຮອງຫົວໜ້າຄະນະພົວພັນຕ່າງປະເທດສູນກາງພັກ, ປະທານກວດກາ. ນອກນັ້ນ, ​ຍັງ​ມີບັນ​ດາ​ສະ​ຫາຍ​ເລ​ຂາ​ໜ່ວ​ຍ​ພັກ, ອົງ​ການ​ຈັດ​ຕັ້ງ​ມະ​ຫາ​ຊົນ, ຄະ​ນະ​ບໍ​ລິ​ຫານ​ງານ​ຊາວ​ໜຸ່ມ, ຄະນະໜ່ວຍ​ຊາວ​ໜຸ່ມ ແລະ ສະ​ມາ​ຊິກ​ຊາວ​ໜຸ່ມ​ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ​ແລະ ພາກ​ສ່ວ​ນ​ກ່ຽວ​ຂ້ອງ ​ຂອງ​ສູນ​ກາງ​ຊາວ​ໜຸ່ມ ​ປະ​ຊາ​ຊົນ ​ປະ​ຕິ​ວັດ​ລາວ ເຂົ້າ​ຮ່ວມ​ຢ່າງ​ພ້ອມ​ພຽງ.

​ໃນພິທີດັ່ງກ່າວ, ສະຫາຍ ຄຳເຟື້ອງ ພັນທະໄຊ, ເລຂາຄະນະບໍລິຫານງານຊາວໜຸ່ມ ຄະນະ ພົວພັນຕ່າງປະເທດສູນກາງພັກ ໄດ້ຂື້ນຜ່ານບົດສະຫຼຸບການເຄື່ອນໄຫວຈັດຕັ້ງປະຕິບັດຂໍ້ແຂ່ງຂັນ 4 ບຸກ ປະຈຳປີ 2019 ເຊິ່ງສາມາດປະເມີນທັງ 4 ດ້ານ ຄື: ບຸກດ້ານແນວຄິດ, ບຸກດ້ານຝຶກຝົນຫຼໍ່ຫຼອມ ຮໍ່າຮຽນ, ບຸກດ້ານວຽກງານການຈັດຕັ້ງ ແລະ ບຸກດ້ານວິຊາຊີບ-ສ້າງວຽກເຮັດງານທຳ ໄດ້ສະເລ່ຍ 91.51%. ຈາກການປະເມີນຜົນການຈັດຕັ້ງປະຕິບັດຂໍ້ແຂ່ງຂັນດັ່ງກ່າວ ເຫັນວ່າຄົບມາດຖານເງື່ອນ ໄຂທີ່ ຄະນະຊາວໜຸ່ມ ປະຊາຊົນ ປະຕິວັດລາວ ວາງອອກ. ຜົນສຳເລັດດັ່ງກ່າວ ຈະເປັນ​ພື້ນ​ຖານ​ສຳ​ຄັນ​ໃຫ້​ແກ່​ການ​ສືບ​ຕໍ່​ຮັກ​ສາ​ນາມ​ມະຍົດຊາວໜຸ່ມ 4 ບຸກ ແລະ ປະຕິບັດຄາດໝາຍສູ້ຊົນ​ຍາດ​ເອົາ​ທຸງ​ໄຊນຳໜ້າຂະບວນການ 4 ບຸກ​ ໃນ​ຊຸມ​ປີ​ຕໍ່​ໜ້າ.

         ການຈັດພິທີ​ປະ​ກາດ​ຮັບ​ຮອງ​ຄະ​ນະ​ຊາວ​ໜຸ່ມ 4 ບຸກ​ ໃນ​ຄັ້ງນີ້​ ຖື​ເປັນ​ເຫດ​ການ​ສຳ​ຄັນປະຫວັດ ສາດ ຂອງຄະ​ນະ​ຊາວ​ໜຸ່ມ​ ຄະ​ນະ​ພົວ​ພັນ​ຕ່າງ​ປະ​ເທ​ດ​ສູນ​ກາງ​ພັກ ເພື່ອເປັນລະນຶກວັນຮັບຮອງເອົາກົດລະບຽບສະບັບທຳອິດຂອງ ຄະນະພົວພັນຕ່າງປະເທດສູນກາງພັກ ເຊິ່ງຖືເປັນວັນສ້າງຕັ້ງ ຄະນະພົວພັນ ຕ່າງປະເທດສູນກາງພັກ ຄົບຮອບ 37 ປີ (29 ມິຖຸນາ 1983 – 29 ມິຖຸນາ 2020) ທັງເປັນການສ້າງຂະບວນການຂໍ່ານັບຮັບຕ້ອນ ກອງປະຊຸມໃຫຍ່ຊາວໜຸ່ມ ຄະນະພົວພັນຕ່າງ ປະເທດ ສູນກາງພັກ ຄັ້ງທີ I ແລະ ກອງປະຊຸມໃຫຍ່ອົງຄະນະພັກ ຄະນະພົວພັນຕ່າງປະເທດສູນກາງພັກ ຄັ້ງທີ II ທີ່ຈະຈັດຂື້ນໃນຕໍ່ໜ້ານີ້. 

 

 

 

2020 06 17 at 14.00

 

2 2020 06 17 at 14.00

 

3 2020 06 17 at 14.00

 

       ໃນຕອນເຊົ້າຂອງວັນທີ 17/06/2020, ຄະນະພົວພັນຕ່າງປະເທດສູນກາງພັກ ໄດ້ຈັດປາຖະກະຖາເຊື່ອມຊືມມູນເຊື້ອ ວິລະກໍາໂຕນຄຸກຢ່າງມະຫັດສະຈັນ ຂອງຜູ້ນໍາຂອງພັກ ແລະ ແນວລາວຮັກຊາດ ຄົບຮອບ 60 ປີ; ວັນເກີດທ່ານ ວະລາດີເມຍ ອີລີສ ເລນິນ ຄົບຮອບ 150 ປີ; ວັນເກີດ ປະທານ ໂຮ່ຈິມິນ ຄົບຮອບ 130 ປີ; ວັນໄຊຊະນະ ຂອງສະຫະພາບໂຊວຽດ ເໜືອຟາດຊິດເຢຍລະມັນໃນສົງຄາມໂລກ ຄັງທີ II ຄົບຮອບ 75 ປີ; ວັນປົດປ່ອຍພາກໃຕ້ ຫວຽດນາມ ຄົບຮອບ 45 ປີ, ເຊິ່ງໃຫ້ກຽດປາຖະກະຖາໂດຍ ສະຫາຍ ປອ ນາງ ສູນທອນ ໄຊຍະຈັກ, ກໍາມະການສູນກາງພັກ, ເລຂາຄະນະພັກ, ຫົວໜ້າຄະນະພົວພັນຕ່າງປະເທດສູນກາງພັກ ແລະ ສະຫາຍ ສົມພອນ ສີຈະເລີນ, ຮອງຫົວໜ້າຄະນະພົວພັນຕ່າງປະເທດສູນກາງພັກ, ໂດຍມີບັນດາສະຫາຍ ໃນຄະນະພັກ, ຄະນະກົມ, ພະແນກ ແລະ ພະນັກງານ ພາຍໃນຄະນະພົວພັນຕ່າງປະເທດສູນກາງພັກ ເຂົ້າຮ່ວມຮັບຟັງຢ່າງພ້ອມພຽງ.

ໃນການປາຖະກະຖາໃນຄັ້ງນີ້, ສະຫາຍ ຫົວໜ້າ ຄະນະພົວພັນຕ່າງປະເທດສູນກາງພັກ ໄດ້​ເລົ່າຄືນ​ປະຫວັດ​ມູນ​ເຊື້ອວິລະກໍາໂຕນຄຸກຢ່າງມະຫັດສະຈັນ ຂອງບັນດາຜູ້ນໍາຂອງພັກ ແລະ ແນວລາວຮັກຊາດທີ່ສ່ອງແສງໃຫ້ເຫັນເຖິງຄວາມປີຊາສາມາດສະຫຼາດສ່ອງໃສ ຂອງຜູ້ນໍາພັກທີ່ມີການວາງແຜນການ ແລະ ມີການເຄື່ອນໄຫວຢ່າງມີໄຫວພິບ ຈົນສາມາດແຫກອອກຈາກຄຸກ ໄປສູ່ເຂດທີ່ໝັ້ນປະຕິວັດໄດ້ຢ່າງປອດໄພ. ສະຫາຍຫົວໜ້າ ຄຕພ ຍັງໄດ້ ຫວນຄືນຊີວິດການເຄື່ອນໄຫວປະຕິວັດ ຂອງປະທານ ໂຮ່ຈີມິນ ຜູ້ນໍາທີ່ແສນຄົບລົບຮັກ ຂອງປະຊາຊົນ ຫວຽດນາມ ເນື້ອໃນໂອກາດວັນຄ້າຍວັນເກີດ ຄົບຮອບ 130 ປີ; ໄດ້ຫວນຄືນຄວາມໝາຍສໍາຄັນ ຂອງໄຊຊະນະ ຂອງປະຊາຊົນຫວຽດນາມ ໃນບັ້ນຮົບໂຮ່ຈິມິນ ໃນເດືອນ ເມສາ 1975, ເຊິ່ງເປັນການສິ້ນສຸດການປະຕິວັດປົດປ່ອຍຊາດ ຂອງ ປະຊາຊົນ ຫວຽດນາມ, ສໍາເລັດພາລະກິດທ້ອນໂຮມປະເທດຊາດ ເປັນເອກະພາບ, ສືບຕໍ່ການສ້າງສັງຄົມນິຍົມຢ່າງໜັກແໜ້ນ, ທັງເປັນການສ້າງໂອກາດທີ່ດີທີ່ສຸດໃຫ້ແກ່ພາລະກິດປະຕິວັດຊາດ ປະຊາທິປະໄຕຢູ່ລາວ, ກ້າວໄປເຖິງການຢຶດອໍານາດ ແລະ ສະຖາປະນາ ສປປລາວ ໃນວັນທີ 02 ທັນວາ 1975.

ຈາກນັ້ນ, ສະຫາຍ ສົມພອນ ສີຈະເລີນ, ຮອງຫົວໜ້າຄະນະພົວພັນຕ່າງປະເທດສູນກາງພັກໄດ້ຫວນຄືນວັນໄຊຊະນະຂອງສະຫະພາບໂຊວຽດ ເໜືອຟາດຊິດເຢຍລະມັນໃນສົງຄາມໂລກຄັ້ງທີ IIຄົບຮອບ 75 ປີ ແລະ ໄດ້ຫວນຄືນເຖິງປະຫວັດຊີວິດ ການເຄື່ອນໄຫວຂອງທ່ານ ເລນິນ, ຜູ້ນຳຂອງມະຫາປະຕິວັດ ສັງຄົມນິຍົມ ເດືອນຕຸລາ ຂອງລັດເຊຍ ປີ 1917 ຄົບຮອບ 150 ປີ, ເຊິ່ງເປັນຜູ້ນໍາໃຊ້ທິດສະດີ ຂອງມາກ ຢ່າງມີຫົວຄິດປະດິດສ້າງ ເຂົ້າໃນສະພາບຕົວຈິງ ຂອງປະເທດລັດເຊຍ, ຈົນກາຍເປັນລັດທິມາກ - ເລນິນ ເຊິ່ງເປັນພື້ນຖານທາງດ້ານທິດສະດີຂອງຂະບວນການປະຕິວັດຊົນຊັ້ນກຳມະຊີບ ມາຮອດປັດຈຸບັນ.

ຜ່ານການຮັບຟັງປາຖະກະຖາໃນຄັ້ງນີ້ ເຮັດໃຫ້ພະນັກງານທົ່ວຄະນະພົວພັນຕ່າງປະເທດສູນກາງພັກ ສາມາດກໍາແໜ້ນມູນເຊື້ອອັນພິລະອາດຫານຂອງບັນດາຜູ້ນໍາຂອງພັກ ປະຊາຊົນ ປະຕິວັດລາວ ໃນການຕໍ່ສູ້ເພື່ອເອກະລາດແຫ່ງຊາດ, ເຂົ້າໃຈເລິກເຊິ່ງກວ່າເກົ່າ ກ່ຽວກັບບັນດາເຫດການທີ່ສຳຄັນຕ່າງໆ, ຮູ້ໄດ້ຜົນງານການເຄື່ອນໄຫວປະຕິວັດຂອງ ຜູ້ນຳທີ່ມີຊື່ສຽງຂອງໂລກທີ່ມີບົດບາດນຳພາປະຊາຊົນ ໃຫ້ຫຼຸດພົ້ນອອກຈາກການກົດຂີ່ຂູດຮີດ.

 

 

 

 

 

 

 23 Mar 2020

 

23 Mar 2020

 

23 Mar 2020

 

ເນື່ອງໃນໂອກາດສະເຫຼີມສະຫຼອງວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 65 ປີ (ວັນທີ 22 ມີນາ 1955 – 22 ມີນາ 2020). ເອກອັກຄະລັດຖະທູດ ແຫ່ງ ສສ ຫວຽດນາມ ປະຈໍາ ສປປ ລາວ, ເອກອັກຄະລັດຖະທູດ ແຫ່ງ ສປ ຈີນ ປະຈໍາ ສປປ ລາວ ແລະ ເອກອັກຄະລັດຖະທູດ ແຫ່ງ ສປປ ເກົາຫຼີ ປະຈໍາ ສປປ ລາວ ໄດ້ເຂົ້າຢ້ຽມຂໍ່ານັບ ສະຫາຍ ປອ ນາງ ສູນທອນ ໄຊຍະຈັກ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ເພື່ອອວຍພອນຄະນະນໍາ ແລະ ພະນັກງານຄະນະພົວພັນຕ່າງປະເທດສູນກາງພັກ.

ໃນໂອກາດນີ້, ບັນດາທູດປະເທດອ້າຍນ້ອງ ໄດ້ຕີລາຄາສູງຕໍ່ການຊີ້ນໍາ-ນໍາພາອັນສະຫຼາດສ່ອງໃສຂອງພັກປະຊາຊົນ ປະຕິວັດລາວ ຕະຫຼອດໄລຍະ 65 ປີທີ່ຜ່ານມາ,​ ພິເສດແມ່ນ ພາຍຫຼັງ 35 ປີແຫ່ງການຈັດຕັ້ງປະຕິບັດແນວທາງການປ່ຽນແປງໃໝ່ຂອງພັກປະຊາຊົນ ປະຕິວັດລາວ ໄດ້ນໍາພາປວງຊົນລາວທັງຊາດຜ່ານຜ່າບັນດາຄວາມຫຍຸ້ງຍາກ, ສິ່ງທົດສອບນາໆປະການ ຈຶ່ງສາມາດຍາດໄດ້ບັນດາຜົນສໍາເລັດອັນໃຫຍ່ຫຼວງ, ຮອບດ້ານ ແລະ ມີຄວາມ ໝາຍປະຫວັດທີ່ສໍາຄັນ ໂດຍສະເພາະແມ່ນ ວຽກງານການຕ່າງປະເທດ ກໍ່ໄດ້ຮັບການເປີດກວ້າງ, ເຮັດໃຫ້ບົດບາດ ແລະ ອິດທິພົນຂອງພັກປະຊາຊົນ ປະຕິວັດລາວ ນັບມື້ຍິ່ງໄດ້ຮັບການຍົກສູງຂຶ້ນໃນເວທີພາກພື້ນ ແລະ ສາກົນ.

ສະຫາຍ ປອ ນາງ ສູນທອນ ໄຊຍະຈັກ ໄດ້ສະແດງຄວາມຂອບໃຈຢ່າງຈິງໃຈ ຕໍ່ການຕີລາຄາສູງບັນດາຜົນສໍາເລັດຮອບດ້ານໃນການຊີ້ນໍາ-ນໍາພາຂອງພັກປະຊາຊົນ ປະຕິວັດລາວ ຕະຫຼອດໄລຍະ 65 ປີທີ່ຜ່ານມາ ແລະ ໄດ້ຕີລາຄາສູງການພົວພັນຮ່ວມມື ລະຫວ່າງ ພັກປະຊາຊົນ ປະຕິວັດລາວ ແລະ ບັນດາພັກອ້າຍນ້ອງ ແລະ ໄດ້ສະແດງຄວາມຮູ້ບຸນຄຸນຕໍ່ການສະໜັບສະໜູນ ແລະ ຊ່ວຍເຫຼືອຢ່າງລໍ້າຄ່າຂອງບັນດາພັກ, ລັດ ແລະ ປະຊາຊົນປະເທດອ້າຍນ້ອງໃນພາລະກິດຕໍ່ສູ້ປະຕິວັດຕ້ານພວກຮຸກຮານຕ່າງຊາດ.

ພິເສດ, ໃນການເຂົ້າຢ້ຽມຂໍ່ານັບ ສະຫາຍ ປອ ນາງ ສູນທອນ ໄຊຍະຈັກ, ກໍາມະການສູນກາງ ພັກ, ຫົວໜ້າຄະນະພົວພັນຕ່າງປະເທດສູນກາງພັກ ໃນຄັ້ງນີ້​ ບັນດາທູດປະເທດອ້າຍນ້ອງ ຍັງໄດ້ສົ່ງສານອວຍພອນ ແລະ ກະຕ່າດອກໄມ້ອວຍພອນຈາກ ຄະນະບໍລິຫານງານສູນກາງພັກກອມມູນິດ ຫວຽດນາມ, ຄະນະບໍລິຫານງານສູນກາງພັກກອມມູນິດຈີນ ແລະ ຄະນະບໍລິຫານງານສູນກາງພັກແຮງງານເກົາຫຼີ ສົ່ງເຖິງ ຄະນະບໍລິຫານງານສູນກາງພັກປະຊາຊົນ ປະຕິວັດລາວ. ນອກຈາກນັ້ນ, ຄະນະບໍລິຫານງານສູນກາງພັກປະຊາຊົນ ກໍາປູເຈຍ ກໍ່ໄດ້ສົ່ງໂທລະເລກອວຍພອນ ເຖິງ ຄະນະບໍລິຫານງານສູນກາງພັກປະຊາຊົນ ປະຕິວັດລາວ ເນື່ອງໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 65 ປີ ເຊັ່ນກັນ.

 

 

 

 

17 Mar 2020

 

 

ໃນຕອນບ່າຍ ວັນທີ 17 ມີນາ 2020 ທີ່ ຄະນະພົວພັນຕ່າງປະເທດສູນກາງພັກ ໄດ້ຈັດພິທີມອບຮັບໃບຢັ້ງຢືນ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ແກ່ 05 ໜ່ວຍພັກ ທີ່ຂຶ້ນກັບ ຄະນະພັກ ຄະນະພົວພັນຕ່າງປະເທດສູນກາງພັກ ໂດຍການເປັນກຽດເຂົ້າຮ່ວມຂອງ ສະຫາຍ ປອ ນາງ ສູນທອນ ໄຊຍະຈັກ, ກຳມະການສູນກາງພັກ, ເລຂາຄະນະພັກ, ຫົວໜ້າຄະນະພົວພັນຕ່າງປະເທດສູນກາງພັກ, ສະຫາຍ ສົມພອນ  ສີຈະເລີນ, ຮອງເລຂາຄະນະພັກ, ຮອງຫົວໜ້າຄະນະພົວພັນຕ່າງປະເທດສູນກາງພັກ, ສະຫາຍ ສົມດີ ບຸນຄຸ້ມ, ກຳມະການຄະນະພັກ, ປະທານກວດກາພັກ, ຮອງຫົວໜ້າຄະນະພົວພັນຕ່າງປະເທດສູນກາງພັກ, ມີບັນດາສະຫາຍໃນ ຄະນະພັກ, ບັນດາສະຫາຍເລຂາ-ຮອງເລຂາໜ່ວຍພັກ, ຕະຫຼອດຮອດສະມາຊິກພັກສົມບູນ ແລະ ສຳຮອງ ພາຍໃນຄະນະພົວພັນຕ່າງປະເທດສູນກາງພັກເຂົ້າຮ່ວມ ຈຳນວນ 70 ສະຫາຍ.

     ໃນພິທີ ສະຫາຍ ນາງ ພອນດາວັນ ພິນສະຫວັນ ຫົວໜ້າຫ້ອງການພັກ, ຫົວໜ້າກົມຈັດຕັ້ງ-ພະນັກງານ ໄດ້ຂຶ້ນຜ່ານບົດລາຍງານສະພາບການເຄື່ອນໄຫວວຽກງານການຈັດຕັ້ງປະຕິບັດແຜນການກໍ່ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ປະຈຳປີ 2019 ຜ່ານມາ ເຊິ່ງສາມາດຮັບຮອງໃຫ້ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຈຳນວນ 05 ໜ່ວຍ ກວມເອົາ 90% ຂອງໜ່ວຍພັກທີ່ຂຶ້ນກັບຄະນະພັກ, ອັນເປັນຂີດໝາຍອັນສຳຄັນໃຫ້ແກ່ ຄະນະພັກ ຄະນະພົວພັນຕ່າງປະເທດສູນກາງພັກ. ກອງປະຊຸມໄດ້ຜ່ານທິດທາງແຜນການສືບຕໍ່ສ້າງແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2020.

       ໃນພິທີມອບ-ຮັບດັ່ງກ່າວ ສະຫາຍ ປອ ນາງ ສູນທອນ ໄຊຍະຈັກ, ກຳມະການສູນກາງພັກ, ເລຂາຄະນະພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ໃຫ້ກຽດໂອ້ລົມ ໂດຍໄດ້ສະແດງຄວາມຊົມເຊີຍຕໍ່ຜົນສຳເລັດຂອງ 05 ໜ່ວຍພັກ ທີ່ໄດ້ມີຄວາມພະຍາຍາມ ແລະ ຄວາມຮັບຜິດຊອບ ໃນການສ້າງໜ່ວຍພັກຂອງຕົນໃຫ້ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕະຫຼອດໄລຍະ 01 ປີທີ່ຜ່ານມາ ເຊິ່ງໄດ້ຮັບການເຫັນດີຈາກຄະນະຈັດຕັ້ງສູນກາງພັກໃຫ້ ໜ່ວຍພັກຫ້ອງການ ຄະນະພົວພັນຕ່າງປະເທດສູນກາງພັກ, ໜ່ວຍພັກກົມຈັດຕັ້ງ-ພະນັກງານ, ໜ່ວຍພັກກົມຄົ້ນຄວ້າ-ສັງລວມ, ໜ່ວຍພັກກົມອາຊີ-ປາຊີຟິກ ແລະ ອາຟຣິກາ ແລະ ໜ່ວຍພັກກົມພົວພັນສາກົນຂອງອົງການຈັດຕັ້ງມະຫາຊົນ ໄດ້ຮັບນາມະຍົດເປັນ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ມີຄວາມເຊື່ອໝັ້ນວ່າ ບັນດາຄະນະໜ່ວຍພັກດັ່ງກ່າວຈະສືບຕໍ່ນຳພາໜ່ວຍພັກຂອງຕົນໃຫ້ຮັກສານາມະຍົດໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃນປີຕໍ່ໄປ, ສ່ວນໜ່ວຍພັກທີ່ຍັງບໍ່ໄດ້ຮັບນາມະຍົດໃນຄັ້ງນີ້ຈະໄດ້ສືບຕໍ່ປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃນຕໍ່ໜ້າ ແລະ ໄດ້ຮຽກຮ້ອງໃຫ້ບັນດາ ພະນັກງານ-ສະມາຊິກພັກ ທຸກສະຫາຍສືບຕໍ່ເປັນແບບຢ່າງນຳໜ້າ, ມີສະຕິຕໍ່ການຈັດຕັ້ງ ເພື່ອປະຕິບັດມະຕິກອງປະຊຸມໃຫຍ່ຂອງ ອົງຄະນະພັກ ຄະນະພົວພັນຕ່າງປະເທດສູນກາງພັກ ຄັ້ງທີ I ໃຫ້ມີຜົນສຳເລັດ ແລະ ກ້າວໄປເຖິງການກະກຽມກອງປະຊຸມໃຫຍ່ 03 ຂັ້ນ ໃຫ້ສຳເລັດ ເພື່ອກ້າວໄປສູ່ການກະກຽມກອງປະຊຸມໃຫຍ່ ຄັ້ງທີ II ຂອງ ອົງຄະນະພັກ ຄະນະພົວພັນຕ່າງປະເທດສູນກາງພັກ ໃຫ້ສຳເລັດໃນຕໍ່ໜ້ານີ້.        

 

 

party x

ສະຖິຕິຜູ້ເຂົ້າຊົມ

261102
Today335
Yesterday353
This_Week688
This_Month5121
All_Days261102